Hydroxyurea го намалува ризикот од сериозни и инвазивни инфекции за 60% кај деца со српеста анемија
Според податоците од новите истражувања, hydroxyurea може значително да го намали ризикот од инфекции кај деца со српеста анемија, поддржувајќи ги резултатите од претходни студии во кои е покажано дека hydroxyurea го намалува морталитетот кај деца од Африка кои се дијагностицирани со оваа болест.
Српеста анемија претставува генетски наследна болест која се карактеризира со структурно модифицирани црвени крвни клетки кои имаат намалена способност да го дистрибуираат кислородот низ целиот организам, што резултира со зголемен ризик од развој на живото-загрозувачки инфекции.
Употребата на hydroxyurea е одобрена во 2017 од страна на FDA ( анг. Food and Drug Administration) во третманот на српеста анемија кај деца, меѓутоа нејзината достапност во афричкиот регион е многу ограничена.
Резултатите од студијата откриваат дека децата кои биле третирани со hydroxyurea покажале 60% намален ризик од сериозни и инвазивни инфекции како маларија, бактеремија, инфекции на респираторниот тракт и гастроентеритис. Студијата вклучувала 117 деца со српеста анемија, при што регистрирани се 9 смртни случаи, од кои 8 биле деца од контролната група која не примала hydroxyurea и 1 смртен случај регистриран 4 дена по започнување на третманот. Дополнително, 5 од смртните случаи биле последица на инфекција.
Научниците објаснуваат дека високата стапка на смртност за време на студијата ја потенцира потребата од опсежни истражувања за откривање нови терапевтски интервенции. Тие објаснуваат дека инфекциите се најсериозните компликации поврзани со српестата анемија и често доведуваат до хоспитализација и смрт кај децата и сметаат дека hydroxyurea треба да биде воведена како стандарден третман на ова генетско заболување со цел намалување на ризикот од инфекции и морталитетот.
Reference:
Indiana University. Hydroxyurea significantly reduces infections in children with sickle cell anemia. News release. January 29, 2024.
Датум на пристап: January 30, 2024.
Достапно на: https://www.eurekalert.org/news-releases/1032714
